Den 21. Juli 2022 huet d'Kulturministesch Sam Tanson d'Resultater vun der Ëmfro iwwert d’Muséespraktiken zu Lëtzebuerg virgestallt, déi 2021 zesumme mam Luxembourg Institute of Socio-Economic Research (LISER) lancéiert gouf.
-
(vu lénks op riets) Jo Kox, Kulturministère; Sam Tanson, Kulturministesch; Monique Borsenberger, LISER
-
(vu lénks op riets) Serge Eifes, Kulturministère; Laurence Brasseur, Kulturministère; Jo Kox, Kulturministère; Sam Tanson, Kulturministesch; Monique Borsenberger, LISER
-
(vu lénks op riets) Serge Eifes, Kulturministère; Laurence Brasseur, Kulturministère; Jo Kox, Kulturministère; Sam Tanson, Kulturministesch; Monique Borsenberger, LISER
D'Ëmfro, déi am Kader vun der Ëmsetzung vum Kulturentwécklungsplang 2018-2028 duerchgefouert gëtt (a besonnesch op d'Recommandatiounen 10 "Eng Zell fir Kulturstudien a Statistiken opbauen" an 47 "Enquête iwwer d'kulturell Praxis vum Land mat enger Periodizitéit vun 10 Joer: 1999, 2009, 2019, ..." ageet), mécht de Bilan vun de Muséespraktike vun der Lëtzebuerger Bevëlkerung an der Referenzperiod vu Mäerz 2019 bis Mäerz 2020, an identifizéiert d'Besoine vun der Ëffentlechkeet oder d'Schwieregkeeten, déi en Deel vun der Bevëlkerung un engem Besuch vun de musealen Ariichtunge vum Land hënneren.
An hirer Ried huet de Sam Tanson un d’Objektiver vun dëser Etude erënnert: "D'Ziler, déi vun dësem Ministère an der Musées- a Kulturpolitik verfollegt ginn, sinn ambitiéis: d'Promotioun an d'Transmissioun vun de Muséeskollektiounen stäerken, e reellen Zougang zur Kultur fir jiddweree garantéieren, Mediatioun, Leit involvéieren, déi op den éischte Bléck méi wäit vun der Kultur stinn... Dës Ziler erfuerdere grëndlech Kenntnisser vun den Zilgruppen an hire Bedierfnesser. Mat dëser Etude maache mir also e wichtegen an onverzichtbare Schrëtt a Richtung vun enger zukünfteger Adaptatioun vun den Entwécklungs- an d'Ënnerstëtzungsmoossname fir de Muséessecteur."
D'Ëmfro weist datt d'Besicherzuele vu patrimoniale Sitten a Muséeën zënter 1999 stänneg wuessen. Insgesamt besiche Muséesvisiteuren déi Lëtzebuerger Muséeë grad esou dacks wéi auslännesch Muséeën. D’Lëtzebuerger Muséeë ginn iwwregens vu méi wéi aacht vun zéng Visiteure fir hir Qualitéit gelueft.
Déi meeschte Muséesgewunnechte weise grouss Ecarten op, an déi sozial privilegiéiert Gruppe maachen déi breet Majoritéit vum Publikum aus. Soziodemographesch Faktore wéi Schoulausbildung, Beruffsgrupp an Akommes sinn nach ëmmer wichteg Determinante vu Muséesbesich.
D‘Correlatioun tëscht Schoulausbildung a Muséesbesich bei Erwuessene weist d'Roll vun de Gewunnechten, déi an der Kandheet geformt goufen, souwuel an der Famill wéi an der Schoul. Präislech reduzéiert Muséesëntréeën zu Lëtzebuerg, souwéi d'Digitaliséierung a gratis Zougang zu enger grousser Zuel vun Online-Muséeën, kënnen déi Gewunnechten, déi an der Kandheet entwéckelt goufen, net briechen.
De Rapport a seng Zesummefaassung (op Franséisch) kënnen op der Websäit vum Kulturministère erofgeluede ginn:
- Le public des musées - Éléments de synthèse de l'enquête sur les pratiques muséales 2020
- Le public des musées en 2020 - Rapport complet
Communiqué vum Kulturministère