De Ministère

D'Fërdere vun der Kultur ass e wesentlecht Basiselement fir eng demokratesch, modern, oppen, tolerant a solidaresch Gesellschaft. Als politesche Responsabel fir d'kulturell Entwécklung um nationalen an internationalen Niveau zu Lëtzebuerg wëllt de Kulturministère de Lëtzebuerger Patrimoine erhalen a fërderen an déi néideg Impulser ginn, fir d'kulturell Kreatioun an d'Promotioun vun de Kënschtler ze ënnerstëtzen.

Innerhalb vum Ministère si verschidden Departementer a Servicer mat dëse Missioune beoptraagt an eng Rei vu finanziellen Hëllefen a Konventioune steet prett, fir dës Ziler ze verwierklechen. Ausserdeem schreift de Ministère a regelméissegen Ofstänn Projeten aus an organiséiert Kënschtlerresidenzen.

Niewent dem Ministère sinn déi verschidde kulturell Instituter vum Staat responsabel fir méi spezifesch Missiounen, dorënner zum Beispill den Archivage an d'Erhale vun eisem Patrimoine an eiser kollektiver Memoire, d'Fërdere vun der Lëtzebuerger Literatur an d'Recherche doriwwer oder d'Vermëttele vum Wëssen. De Ministère fleegt och wichteg Relatioune mat enger ganzer Rei vun Ëffentlechen Etablissementer an anere kulturellen Institutiounen, iwwer déi hien d'Tutelle huet.

De Kulturministère, deen sech senger Verbindungsroll bewosst ass, koordinéiert d'Relatiounen tëschent de verschiddene kulturellen Acteuren zu Lëtzebuerg an organiséiert e regelméissegen Echange mat hinnen am Kader vun de kulturellen Assisen.

Op internationalem Niveau ass de Ministère aktiv um Niveau vun den Institutioune vun der Europäescher Unioun an op deem vu gewëssenen internationalen Organisatiounen. Am Interessi vun engem interkulturellen Echange huet de Kulturministère am Laf vun de Joren e ganze Koup kulturell Accorden ofgeschloss mat de Länner vun der Europäescher Unioun an doriwwer eraus.

Aktualiséiert